Əsl Ad Günü Sevinci Üçün Endirim Şərtlərimiz Yeniləndi!

“Yaşın Qədər Endirim” kampaniyasında yeni tətbiq olunan şərtlər haqqında məlumat.

Uzun illərdir ki, pizza restoranlarımızda qonaqlarımıza xüsusi və sevilən bir kampaniya – “Yaşın Qədər Endirim” kampaniyasını təqdim edirik. Bu təşəbbüs, ad günü olan şəxslərə onların yaşı qədər faiz endirim etməklə, xoş günlərini yaxınları ilə birlikdə bizim restoranlarımızda qeyd etmələri üçün yaradılmışdır. Xüsusilə yaşlı nəslin ad günlərini qeyd etmək üçün ailələri təşviq edən bu kampaniyadan minlərlə qonağımız faydalanmışdır və faydalanmağa davam edəcəkdir.

Lakin təəssüflə qeyd etməliyik ki, son aylarda bu kampaniyadan sui-istifadə hallarının artdığını müşahidə etmişik. Bəzi şəxslər, tanımadıqları yaşlı insanları yalnız endirim əldə etmək üçün restoranlarımıza gətirir, hətta bəzən sifariş etdikləri pizzaları ad günü olan şəxslərlə paylaşmadan, öz məqsədləri üçün istifadə edirlər. Bu cür hallar kampaniyanın ruhuna və məqsədinə ziddir.

Məhz bu səbəbdən, 1 may 2025 tarixindən etibarən kampaniyada aşağıdakı dəyişiklik qüvvəyə minəcək:

Kampaniya çərçivəsində təqdim olunan maksimum endirim 5 pizza ilə məhdudlaşdırılır. Digər şərtlər dəyişilməz qalır. Bu dəyişiklik, kampaniyanın davamlılığını təmin etməklə yanaşı, onun əsas ideyasını – ad günlərini bizim restoranlarda, ailə və dostlarla birlikdə qeyd etmək məqsədini qoruyub saxlayacaqdır. 5 pizza isə istənilən halda böyük bir ailənin birgə bayramı üçün kifayət edəcək həcmdədir.

Biz bu fürsətdən istifadə edərək bütün gəncləri və ailələri yaşlı nəslə diqqət göstərməyə, onlara hörmətlə yanaşmağa və onların ad günlərini səmimi şəkildə qeyd etməyə çağırırıq. Onların üzündə sevinc və gülüş görmək, bizim üçün bu kampaniyanın ən böyük mükafatıdır.

Qonaqlarımıza göstərdikləri anlayış və dəstəyə görə təşəkkür edirik.